運動創傷針灸｜舊患成日翻發?拆解3個運動傷患誤解｜上水北區中醫
香港註冊中醫 羅潔馨醫師 撰／審
跑完步膝頭又痛返、打完波腳踝又腫，總係同一個位出事。好多恆常做運動嘅人都有一兩個「老朋友」舊患，平時唔覺，一加運動量就返嚟。舊患反覆發作，好多時同受傷之後幾個常見誤解有關。
誤解一：痛就食止痛藥，照樣落場
止痛藥可以暫時壓低痛楚，但受傷位置仍然喺修復緊；帶住傷繼續操，細傷容易變大傷。中醫睇運動傷患，會先分清傷喺筋、喺骨，定係氣血瘀滯，再由根源處理。
誤解二：休息幾日唔痛，就等於好返
痛楚減退，唔代表受傷位置已經完全復原。關節活動幅度同肌肉力量未恢復，就急住返去高強度運動，係舊患翻發最常見嘅原因之一。恢復期宜循序漸進：先回復活動幅度，再練返力量，最後先返到原本嘅運動強度。
誤解三：針灸只係即時止痛
針灸可以較快幫手紓緩痛楚，但作用唔止於此。中醫治療運動傷患，以針灸行氣活血、疏通經絡、放鬆繃緊嘅肌肉，配合推拿處理舊患位置嘅繃緊，再按體質用中藥活血化瘀、強筋健骨，由內到外幫身體修復。世界衞生組織亦已將扭傷、網球肘、膝痛等列入針灸可以處理嘅範圍。
針灸處理運動傷患，有咩唔同做法？
局部配穴：喺受傷位置附近取穴，疏通局部氣血，適合慢性勞損同舊患。
遠端取穴：急性扭傷時，可以先取遠離受傷位置嘅穴位，一邊行針一邊輕輕活動受傷部位，避免直接刺激腫痛位置。
配合推拿同中藥：針灸之後配合推拿放鬆周圍肌肉，再按情況內服或外敷中藥。
療程長短會因應受傷位置、拖咗幾耐同個人體質而有所不同。
常見嘅運動舊患位置
膝頭：跑步、行山落斜最常見（膝頭痛）。
腳踝：打波急停、行山踩空，一拗再拗（拗柴）。
腳跟：跑步量一加就痛（足底筋膜炎）。
手肘：打網球、羽毛球（網球肘）。
膊頭：游水、打波、做Gym推舉（膊頭痛）。
重返運動前，留意三件事
活動幅度回復：受傷關節屈伸同另一邊差唔多，唔會卡住或者扯住痛。
單邊承重唔痛：例如腳踝受過傷，可以單腳企穩，唔會痛或者搖晃。
逐步加量：由平時大約一半強度開始，再一星期一星期慢慢加返。
幾時應該求醫？
同一個位置一年內扭傷幾次；運動後痛到第二日都未退；關節有鬆脫、唔穩嘅感覺。出現以上情況，宜盡早由註冊中醫師評估。受傷第一時間點處理，可以睇上篇運動創傷中醫。
應診資訊
北區中醫治療中心
應診時間：星期二、三、五、六、日 上午10時至下午7時（星期一及星期四休息）
本中心接受長者醫療券。
歡迎預約應診。
常見問題
Q1：舊患已經好多年，仲可以做針灸嗎？
可以。舊患病程較長，療程亦會較長，治療會按受傷位置、現時狀況同體質調整，配合推拿、中藥同循序漸進嘅鍛煉。
Q2：做完針灸，幾時可以返去做運動？
一般當日可以做輕度活動。返回劇烈運動嘅時間，要視乎傷患恢復程度，宜按中醫師評估，循序漸進咁加返運動量。
Q3：針灸可唔可以同物理治療一齊做？
可以互相配合。建議就診時講返而家接受緊嘅治療，方便按實際情況配合安排。
以上內容僅供參考，個別情況請諮詢香港註冊中醫師。
留言