小腿抽筋｜半夜痛醒係咪缺鈣?點解晚上特別易抽筋｜上水北區中醫
香港註冊中醫 廖曠達醫師 撰／審
瞓到半夜轉個身、伸一伸腳，小腿突然揪實，痛到即刻扎醒。之後唔敢再伸直隻腳，下半晚都瞓得唔安樂。唔少中年同長者病人都有同一個問題：「係咪缺鈣？使唔使食鈣片？」以下逐一解答。
點解偏偏喺半夜抽筋？
抽筋最常見係小腿後面嘅肌肉突然收緊，硬晒、屈唔到又伸唔到，一般維持幾秒至幾分鐘。入睡之後平躺，腳板自然向下，小腿肌肉長時間處於收短狀態；轉身或者伸腳嗰下，本身已經收短嘅肌肉突然再收緊，就容易抽筋。從中醫角度睇，入夜之後氣血運行較慢，如果再踢被、冷氣直吹腳，寒主收引，筋肉就更易拘急。
年紀愈大，夜間抽筋愈常見，亦好影響睡眠質素。肌肉量隨年紀慢慢減少，肌肉較易疲勞，日間行得多、企得耐，小腿攰咗，夜晚就更易抽筋。
係咪缺鈣？要唔要食鈣片？
好多人一抽筋就諗起鈣片。鈣同肌肉收縮有關，加上長者成日聽人講「年紀大要補鈣」，自然覺得抽筋就係缺鈣。
其實身體會將血液入面嘅鈣維持喺好穩定嘅水平，日常飲食正常嘅人，血鈣好少會低到引起抽筋。真正血鈣過低，多數同甲狀旁腺或者腎臟問題有關，要處理嘅係背後嘅病，唔係自己買鈣片食。大部分半夜抽筋都搵唔到單一原因，較常見同肌肉疲勞、神經訊號過度活躍，以及平躺時小腿肌肉收短有關；部分人則同血管、腰椎或者神經方面嘅問題有關。所以單靠食鈣片未必幫到手，補得太多亦可能帶來便秘等問題，唔建議自行大量補鈣。
長期食藥，會唔會令抽筋多咗？
患有高血壓、心臟衰竭或者水腫嘅長者，好多都要長期食利尿劑；有哮喘或者慢性阻塞性肺病嘅長者，亦可能長期用長效氣管舒張吸入劑。呢兩類藥物有機會增加抽筋嘅機會，但唔代表抽筋一定係藥物引起，亦唔好因為抽筋就自行停藥或者減藥。
抽筋可能同藥物有關，亦可能同肌肉疲勞、腰椎或者血管問題等其他原因有關，重點係找出真正嘅成因。
中醫點睇半夜抽筋？
中醫稱抽筋為「轉筋」。肝主筋，脾主肌肉同四肢，筋肉要柔軟有彈性，靠肝血同脾氣滋養。年紀漸長、平日勞累或者氣血不足，筋肉得唔到足夠濡養，入夜之後就特別容易拘急。中醫治療會先分清屬於邊一類：
氣血不足：容易攰、面色較淡，多數喺勞累之後發作，治療以益氣養血為主。
寒濕阻絡：怕凍，遇冷或者吹冷氣之後特別易發，治療以溫經散寒、舒筋活絡為主。
肝腎不足：多見於年紀較大嘅病人，兼有腰膝酸軟，治療以補益肝腎為主。
常用方劑如芍藥甘草湯，再按體質加減。香港中文大學一項研究亦發現，以芍藥甘草湯加味調理，有助紓緩長者夜間抽筋嘅痛楚。針灸方面，常取小腿後面嘅承山穴，配合足三里、三陰交等穴位，幫助放鬆繃緊嘅小腿肌肉、改善下肢氣血運行。
抽筋嗰陣，即刻可以點做？
拉直隻腳：坐起身，膝頭伸直，用手或者毛巾將腳掌腳尖拉向自己，慢慢拉鬆小腿，維持約30秒。
輕輕按摩：抽筋放鬆之後，由下而上輕揉小腿。
暖一暖：用暖毛巾敷小腿，幫助肌肉放鬆。
抽完之後先唔好急住落床行，坐定一陣先起身，以免跌倒。
瞓前做好幾件事，減少半夜抽筋
睡前拉筋：對住牆企弓箭步，後腳伸直、腳跟貼地，拉鬆小腿後面，每邊約30秒。瞓前將小腿拉鬆，等肌肉放鬆落嚟先瞓。
暖水浸腳：睡前用暖水浸腳十分鐘左右。
腳部保暖：著長褲或者薄襪瞓，避免冷氣、風扇直吹腳。
如果瞓得唔好已經成為長期問題，可以參考失眠針灸。
幾時要盡快求醫？
一星期發作幾次；抽完之後條腿持續腫痛、發紅發熱；小腿有明顯青筋凸起；或者開始食新藥之後先出現抽筋。出現以上情況，宜盡早求醫，找出背後原因。
參考資料
香港中文大學香港中西醫結合醫學研究所. Effectiveness of Herbal Medicine (Shaoyao Gancao Decoction Jiawei) in Sleep-related Leg Cramps: A Pilot Study.
應診資訊
北區中醫治療中心
應診時間：星期二、三、五、六、日 上午10時至下午7時（星期一及星期四休息）
本中心接受長者醫療券。
歡迎預約應診。
常見問題
Q1：晚晚都抽筋，可以做針灸嗎？
可以。針灸常配合中藥一齊調理，按抽筋嘅類型同體質選穴同用藥。療程長短會因應發作頻率同體質而定。
Q2：飲紅糖水可以預防抽筋嗎？
坊間有呢個講法，但暫時冇研究證明紅糖水可以預防抽筋，晚晚飲亦會攝取過多糖分。瞓前拉筋、腳部保暖會更實際。
Q3：運動嗰陣抽筋，同半夜抽筋一樣嗎？
運動時抽筋多數同肌肉疲勞有關，例如運動量突然加大，處理方向唔完全一樣。運動受傷第一時間點處理，可以參考運動創傷中醫。
以上內容僅供參考，個別情況請諮詢香港註冊中醫師。
留言