抽筋原因｜點解成日抽筋?4類常見成因同中醫調理｜上水北區中醫
香港註冊中醫 羅潔馨醫師 撰／審
行行下街小腿突然扯實、做完運動腳趾屈埋拉唔返直，或者企耐咗腳底一陣陣硬晒。抽筋偶然一次唔算大問題，但如果成日發生，就值得了解背後原因。半夜瞓覺抽筋嘅情況，可以參考小腿抽筋；呢篇集中講點解有啲人特別容易抽筋。
抽筋係咩事？
抽筋即係肌肉唔受控制咁突然收縮，收緊之後鬆唔返，摸落去硬實，痛楚由幾秒到幾分鐘不等。最常見喺小腿後面，其次係大腿後面、腳掌同腳趾。中醫稱抽筋為「轉筋」，屬筋脈拘急。
容易抽筋嘅4類常見原因
肌肉疲勞，缺乏伸展：運動量突然加大、跑步行山去到後段，或者日常要長時間企、行，肌肉攰咗又冇拉鬆，神經對肌肉嘅控制失去平衡，就容易抽筋。坊間成日話運動抽筋係「缺水、缺鹽」，但目前較多證據指向肌肉疲勞，所以運動前後熱身同伸展更加重要。
受寒受濕：從中醫角度睇，寒主收引。肌肉長時間吹冷氣、淋雨或者浸凍水，寒濕阻滯經絡，氣血運行唔暢順，筋肉就容易拘急。
氣血不足，筋肉失養：肝主筋，脾主肌肉。年紀漸長、病後體虛或者長期勞累，氣血不足，筋肉得唔到足夠滋養，就特別易抽筋，常見於長者。懷孕中後期抽筋亦幾常見，日常可以多做拉筋，注意保暖。
其他身體情況或者藥物：例如嚴重肚瀉、嘔吐之後身體流失礦物質；糖尿病影響神經、腰椎問題壓住神經、腳部血液循環差，都可能令抽筋變得頻密。部分長期服用嘅藥物，例如利尿劑，亦有機會增加抽筋。
中醫點樣調理容易抽筋？
中醫治療抽筋，會先分清屬於邊一類，再按體質選擇方法，常會幾種一齊配合：
中藥：氣血不足以益氣養血為主；受寒受濕以溫經散寒、舒筋活絡為主。常用方劑如芍藥甘草湯，再按體質加減。
針灸：常取小腿後面嘅承山穴，配合陽陵泉、足三里等穴位。陽陵泉係「筋會」，即係筋嘅匯聚之處，有助舒筋活絡，放鬆繃緊嘅肌肉。
推拿：透過手法放鬆繃緊嘅肌肉，改善局部血液循環。
拔罐：適合肌肉長期繃緊、受寒濕困擾嘅情況，幫助行氣活血。
日常點樣減少抽筋？
運動前後熱身同伸展：特別係小腿同大腿後面，每個動作維持約30秒。
運動量循序漸進：唔好一下子跑得太遠、行得太耐，等肌肉慢慢適應。
長時間企或者坐，要定時郁下：每隔一陣踮下腳、行兩步，避免肌肉一直維持同一個姿勢。
注意保暖：避免冷氣直吹腳，落雨濕身之後盡快抹乾換衫。
揀啱鞋：鞋底有承托、唔好太硬，減少腳部負擔。
運動期間抽筋，或者舊患反覆發作，可以參考運動創傷針灸。
幾時要盡快求醫？
抽筋次數愈來愈密，影響日常生活或者睡眠；抽筋之外仲有麻痺、無力；單邊腳腫痛、發紅發熱；或者肌肉明顯變瘦。出現以上情況，宜盡早求醫，找出背後原因。
應診資訊
北區中醫治療中心
應診時間：星期二、三、五、六、日 上午10時至下午7時（星期一及星期四休息）
本中心接受長者醫療券。
歡迎預約應診。
常見問題
Q1：食鎂片可以預防抽筋嗎？
坊間好多人會食鎂片，但對一般長者嘅抽筋，鎂補充劑幫助唔大，食多咗亦可能引起肚瀉。與其靠補充劑，不如先做好伸展同保暖，再按體質調理。
Q2：抽筋之後條腿痛咗一兩日，正唔正常？
抽筋好勁嘅時候，肌肉可能有輕微拉傷，之後酸痛一兩日都算常見，可以熱敷同輕輕按摩。如果持續腫痛、發紅發熱，就要盡快求醫。
Q3：針灸調理抽筋，要做幾耐？
療程長短會因應抽筋嘅原因、發作頻率同體質而有所不同。針灸常配合中藥一齊調理，標本兼治。
以上內容僅供參考，個別情況請諮詢香港註冊中醫師。
留言