面癱點算好？中醫針灸治療面癱黃金期
已更新：10月13日
香港註冊中醫 羅潔馨醫師 撰／審
面癱，醫學上稱為「面部神經麻痺」，是指面部其中一邊嘅肌肉突然失去控制，出現眼瞼閉合唔到、嘴角歪斜、飲水漏水等情況。不少人一覺醒來發現自己口眼歪斜，第一時間以為中風；其實大部分屬於「貝爾氏麻痺症」（Bell's Palsy），與中風不同，但同樣需要盡快處理。以下從中醫角度，講解面癱嘅成因、與中風嘅分別、黃金治療期及針灸治療方向。
面癱有咩症狀？
面癱多數突然發生，不少人是朝早起身先察覺。常見症狀包括：
面部一邊肌肉無力，甚至完全郁唔到
眼瞼閉合唔到，眼睛容易乾澀流淚
嘴角歪斜
飲水或進食時會漏出
面部麻木或繃緊
耳後或耳朵附近疼痛
味覺減退、發音唔清
如突然出現以上症狀，毋須過分驚恐，但應盡快求醫，排除中風之後，便要把握治療黃金期。
面癱與中風有咩分別？
面癱發作時，病人最擔心嘅就是係唔係中風。兩者最主要嘅分別：
面癱（貝爾氏麻痺）：只影響面部一邊，連額頭都會受累（皺唔到額）；手腳活動正常，意識清醒，沒有頭暈嘔吐。
中風：除面部歪斜外，多數伴隨手腳無力或麻木、言語不清、視力模糊、劇烈頭暈，而額頭部分通常不受影響。
如出現手腳無力、言語不清等情況，應即刻叫救護車；如只是面部單側無力、手腳正常，則較大機會為面癱，但仍建議盡快求醫確認。
點解會面癱？
面癱嘅確切成因，醫學上尚未完全確定，一般認為與以下因素有關：
病毒感染：帶狀疱疹、感冒病毒等可令面部神經發炎腫脹
受寒：即中醫所講嘅「風寒侵襲」，例如冷氣直吹面部
過度疲勞：捱夜、壓力大、免疫力下降
耳部感染：中耳炎等耳部問題可能影響面部神經
從中醫角度，面癱多因「風邪入絡」而起，風寒或風熱之邪侵襲面部經絡，令氣血運行受阻，面部肌肉失於濡養而見癱瘓。
面癱治療黃金期
面癱治療有一個重要概念，就是黃金治療期。
發病後一至七日（急性期）：面部神經發炎腫脹，中醫以疏風散寒、通絡消腫為主。及早治療，有助面部神經盡快恢復。
發病後一至四星期（恢復期）：最關鍵嘅治療階段。面部神經開始修復，針灸有助促進神經恢復功能，令面部肌肉逐步恢復活動能力。
發病後一至三個月（後遺症期）：若超過三個月仍未完全恢復，有機會留下後遺症，此階段主要處理殘餘症狀及預防面肌痙攣。
整體而言，越早開始治療，恢復一般越順利；把握發病一星期內嘅黃金期開始針灸，對恢復尤其有幫助。
中醫點樣治療面癱？
中醫治療面癱歷史悠久，當中針灸更是公認最有效嘅方法之一。
針灸：針灸是治療面癱嘅核心。於面部及身體特定穴位施針，有助疏通面部經絡、促進神經修復、改善局部血液循環，刺激麻痺嘅肌肉恢復功能。常用穴位包括翳風、地倉、頰車、陽白、四白、合谷等，取穴與手法會因應病情而調整。世界衞生組織（WHO）已將面癱列為針灸嘅適應症之一。
中藥：面癱亦會因應體質配合中藥。急性期以祛風散寒、活血通絡為主；恢復期以補氣養血為主；後遺症期則以補益肝腎為主。針灸配合中藥，效果一般較單用一種方法為佳。
推拿：病人亦可於家中自行做面部推拿按摩，作為輔助，有助促進血液循環，幫助面部肌肉恢復。
面癱針灸治療要做幾多次？
面癱恢復快慢因人而異，與病情輕重、開始治療嘅早晚都有關。及早把握黃金期開始針灸，恢復一般較為順利；針灸可以較快幫手疏通面部經絡、促進神經修復，令面部肌肉逐步恢復活動。實際要做幾多次、幾密，會按每次恢復進度而定，中醫師會因應情況調整，毋須一開始就擔心要拖得好耐。
面癱日常護理
除接受治療外，日常護理亦相當重要：
眼部護理：眼瞼閉合唔到時要保護眼睛，睡覺可用眼罩，日間可用人工淚液
面部保暖：避免受寒，外出可戴口罩，勿對住冷氣直吹
飲食：宜清淡，避免生冷辛辣
充足休息：保證足夠睡眠，避免過度疲勞
面部運動：可做皺眉、閉眼、鼓腮、微笑等動作，幫助面部肌肉恢復
常見問題
Q：面癱會唔會自己好返？
部分輕度面癱可自然恢復，但過程可能需時數月，亦不一定能完全康復。針灸有助面部神經盡快恢復，減少後遺症嘅機會，因此建議不宜拖延，宜及早治療。
Q：面癱會唔會翻發？
面癱有機會翻發，只要保持良好生活習慣、避免過度疲勞及受寒，便可減少翻發嘅機會。
Q：面癱影響外觀，心理壓力很大，點算好？
面癱對外觀嘅影響的確會帶來心理壓力，這種反應十分正常。值得留意嘅是，大部分面癱病人經適當治療後都能恢復；保持積極心態、配合治療，一般都會有理想結果。
Q：邊個年齡層較容易面癱？
面癱可發生於任何年齡，但以二十至四十歲嘅成年人最常見。孕婦、糖尿病病人及免疫力較低者風險相對較高。
Q：面癱期間可唔可以做運動？
可進行適度運動，但應避免劇烈運動及面部受寒；運動時注意保暖，避免於大風環境下進行。
應診資訊
北區中醫治療中心位於上水石湖墟新成路129號地舖，鄰近上水港鐵站，步行約五分鐘。面癱治療宜早不宜遲，如欲就診，歡迎致電查詢或預約。
應診時間：星期二、三、五、六、日 上午10時至下午7時（星期一、四休息，公眾假期照常）
延伸閱讀
以上內容僅供參考，個別情況請諮詢香港註冊中醫師。
留言