耳鳴針灸｜中醫針灸中藥調理耳仔嗡嗡聲同腎虛肝火｜上水北區中醫
香港註冊中醫 羅潔馨醫師 撰／審
耳鳴，相信好多人都唔陌生，但偏偏最常見嘅反應就係唔理佢，忍一忍、當冇事。其實耳鳴好多時係身體響起嘅一個警號，提你腎、肝同氣血可能開始失衡。連續捱咗幾晚夜，終於攤得上床，一熄燈、四周靜晒，耳仔就突然響起一把「吱吱」長鳴，跟住嗡嗡咁響落去，愈靜愈聽得清楚，想瞓都靜唔落；又或者返緊工、同人傾緊偈，耳邊忽然有把聲蓋過人哋把聲，要側埋耳先聽得清楚。呢種「得自己聽到」嘅耳鳴，好多上水、北區街坊都試過，有啲一時三刻就冇，有啲就反覆持續咗好耐。亦唔好以為淨係上咗年紀先會耳鳴，其實咩年紀都有機會。中醫有「腎開竅於耳」嘅講法，耳鳴往往反映腎、肝同氣血嘅狀態，透過針灸配合中藥，可以由根本調理。
耳鳴係咩
耳鳴係指喺冇外界聲音嘅情況下，自己持續或者間歇聽到聲響，可以係嗡嗡、吱吱、低鳴，亦有人形容似蟬鳴或者流水聲。耳鳴本身唔算係一個獨立疾病，而係身體發出嘅一個訊號，背後可能同疲勞、壓力、睡眠不足、長期戴耳機、年紀漸長或者其他身體狀況有關。好多時耳朵檢查話結構冇明顯問題，但嗡嗡聲依然揮之不去，影響專注同休息。
中醫點睇耳鳴
中醫有「腎開竅於耳」嘅講法，耳嘅功能同腎關係密切。臨床上見到，單純腎虛多數令聽力下降；至於耳鳴，往往仲要有一股向上擾動耳竅嘅「火」，當中以勞累、虛弱而生嘅虛火最常見，所以好多人都係攰過頭、捱夜之後先開始耳鳴。大致可以分兩類：
外感風寒：多係感冒前後突然出現嘅耳鳴，外邪循經絡上擾耳竅，處理以疏風散寒為主。
火擾耳竅：腎虛加上虛火，又或者情緒緊張嘅肝火、飲食肥膩嘅痰火，向上擾動耳竅，就會嗡嗡作響，常見於勞累、壓力、睡眠不足之後，有時仲會伴隨頭皮出油、記性差。處理以補虛降火為主，按體質兼顧平肝、化痰。
中醫師會根據耳鳴嘅聲調、出現時間、伴隨症狀同整體體質，辨證論治，唔一概而論。
針灸同中藥點樣配合
處理耳鳴，一般會針灸同中藥並用，兩者各有角色。
針灸：一方面喺耳周取穴，例如聽會、翳風、風池，疏通耳部周圍嘅經絡、行氣活血；另一方面配合遠端穴位，例如肝膽經嘅太衝、俠谿處理肝火，腎經嘅太谿調補腎氣，再按情況用中渚、外關等調節整體氣血，亦會因應情況運用頭皮針。
中藥：按辨證論治，外感風寒會疏風散寒，虛火擾耳會滋腎降火（例如知柏地黃丸一類加減），肝火會清肝瀉火，痰火會清熱化痰，由內在體質著手。
現代研究發現，針灸對耳鳴有幫助，當中頭皮針嘅正面效果尤其受關注；針對同壓力、精神緊張有關嗰種耳鳴，改善空間亦較明顯。中醫臨床上會因人而異、循序漸進咁調理，針對你屬於邊一種體質去落針同開方。耳鳴成因多，病程亦有長有短，中醫師會按你嘅情況建議合適嘅療程。
曾經有位街坊，持續聽到耳仔有嗡嗡聲，夜晚特別明顯，想瞓都靜唔落嚟，去檢查又話耳朵結構冇大問題。經中醫辨證，屬於腎精不足夾肝火，於是以針灸疏通耳周經絡、平肝補腎，再配合中藥調理體質，之後覺得嗡嗡聲冇咁擾人，人都精神返、瞓得好啲。
邊啲人容易有耳鳴
長期捱夜、壓力大、情緒緊張嘅人；長時間戴耳機、喺嘈雜環境工作嘅人；飲食肥膩、嗜濃茶咖啡嘅人；年紀漸長、腎氣漸弱，或者大病久病之後氣血不足嘅人。呢類人比較容易出現耳鳴，或者令本身嘅耳鳴加重。
日常可以做嘅三件事
調整作息、減壓：盡量唔好捱夜，畀耳朵同身體有足夠休息，情緒緊張時做下深呼吸、放鬆。
保護耳朵：避免長時間大音量戴耳機，喺嘈雜環境適當讓耳朵抖一抖。
輕按兩個穴位：聽會穴喺耳珠前、張口有凹陷嘅位置；翳風穴喺耳垂後方嘅凹陷位。每邊用手指輕力按 1 至 2 分鐘，有痠脹感就啱。呢個係日常保養，配合治療用，唔係代替治療。
幾時應該搵中醫
耳鳴其實好似身體嘅一個提醒，話你知最近太攰、要善待下自己，偶爾出現、好好休息多數會緩和。如果耳鳴持續、反覆，或者開始影響睡眠、專注同情緒，就唔好再拖，及早辨證調理，一般會較易處理。要特別留意：如果耳鳴係突然出現，伴隨單邊聽力明顯下降、耳塞感或者頭暈，就要盡快睇醫生檢查，排除需要即時處理嘅情況。
應診資訊
北區中醫治療中心位於上水石湖墟新成路129號地舖，鄰近上水港鐵站，步行約 5 分鐘。粉嶺、天水圍街坊亦可乘車前來。應診時間：星期二、三、五、六、日；星期一、四休息。
上水、北區街坊受耳鳴困擾，想搵香港註冊中醫師應診，歡迎預約。本中心接受長者醫療券，減輕長者街坊嘅負擔。
常見問題
Q1：耳鳴可以斷尾嗎？
耳鳴成因好多。同作息、壓力有關嘅，透過調理體質同改善生活習慣，有機會逐步改善；同年紀或者其他身體狀況有關嘅，中醫師會幫你紓緩困擾、提升日常生活質素，按你嘅情況講解可以點樣處理。
Q2：針灸耳鳴會唔會好痛？
針灸用嘅針好幼細。落針得氣時會有痠、麻、脹嘅感覺，耳周穴位會有少少脹感，中醫師會按你嘅感覺調整手法同深度。
Q3：淨係針灸得唔得，一定要食埋中藥？
視乎你嘅體質同耳鳴類型。急性、以外感或者火擾為主嘅，針灸行氣活血可以較快幫手紓緩；如果係腎虛夾虛火、氣血不足引起，配合中藥由內在調理會較全面，雙管齊下通常較理想。
Q4：捱夜同壓力真係會引起耳鳴？
係。捱夜、情緒緊張容易令肝火上擾、氣血失調，喺中醫角度係耳鳴常見嘅誘因，所以調理作息同情緒，係處理耳鳴好重要嘅一環。
以上內容僅供參考，個別情況請諮詢香港註冊中醫師。
留言